Kostaldetik Hernanira egin dugu salto. Zero zabor hozkailua jarri dute martxan berriki. Elikagaien xahutzearen kontra egin nahi du udalak, pertsona batzuen elikagai soberakinak beste batzuen eskura jarriz eta hondakin organikoaren prebentzioan eta zero zabor kudeaketan beste pausu bat emanez.

Bilbora ere gerturatu gara Sustraiak katering proiektua ezagutzeko. Lehen urratsak Bilboko Kukutza gaztetxean eman zituzten, eta gaur egun emakumez osatutako kooperatiba bat da, sukaldearen bueltan biltzen dena. Pandemiak ekarri zuen katering eskaririk ez egotea, eta mehatxua aukera bihurtzen jakin dute, dendatxo txiki bat ireki baitute Bilbon, eta bertan eros daiteke janari agroekologikoan oinarritutako plater begetarianoak.